هلع

 من أكثر التجارب المرعبة لي مريت بيهم هوما نوبات الذعر، أو نوبات الهلع، أو ال panic attacks.

طبعا مثماش ترجمة واضحة بالعربية نظرا لعدم الاهتمام بالموضوع أصلا، حتى انو الanxiety ترجمناها للقلق ولي هي مرادف عربي بعيد جدا عن المعنى المُراد من الكلمة، وحتى الهلع فهو كمصطلح فهو محاولة للاقتراب من المعنى.

نوبات الهلع شبيهة جدا في العوارض الأصلية، وتقريبا تحمل نفس أعراض النوبات القلبية (heart attack) والسكتة الدماغية (stroke)، تحس قلبك بش ياقف، بش ينفجر من قوة وسرعة وارتفاع الدقات بشكل جنوني، يتقص عليك النفس تماما، وتولي تبربص، وأحيانا تفقد الوعي وترد وتدوخ وفمك يشيح ويولي شوك في حلقك وحجر.

تعرضت لنوبات هلع في تونس وفي أمريكا ومرة في الطيارة في السماء، في تونس نمشي للاستعجالي والطبيب يحاول يعطيني مهدئات بش نرتاح كيما سيداتيف، ويصارحني ويقلي راهو بلحق منجموا نعملوا شي آخر، وفي امريكا كيف كيف مع اختلاف في جرعات البوتاسيوم والمورفين أحيانا وتحاليل اخرى للتثبت من عدم وجود أسباب أخرى. عمري ما ننسى الفجعة وسيارة الاسعاف والهبوط الحاد في دقات القلب واضطراب الممرض المساعد وجرعات المهدئ وفمي لي تشقق والدنيا لي دارت بيا ووليت نحاول نتقبل أن ساحة الرحيل قد حانت ، وصحابي لي منجم حد يجي معايا ولا يزورني بسبب فيروس كورونا والولوج المحدود جدا للعيادات ومنع الزيارات واني بش نموت بعيد على عايلتي ودارنا ومش بش نشوف حد، والرداد لي رديتو على الرابعة صباحا والممرض ينظف فيا وفي دبشي وكم الخجل الذي احسست به بسبب ذلك.

نوبة الهلع تجربة اقتربت بي من الموت كثيرًا، تولي تشوف الموت أكثر من مرة، ويصبح اقترابك منه أمرًا منتظرًا في كل مرة، وقت يظلام كل شيء وتحاول قبول حتمية رحيلك يومًا ما، وتستعد لذلك، وتحاول ارخاء عضلاتك لكنها تتشنج دون توقف بشكل مؤلم جدا، ثم غيابك الطويل عن الوعي ظنا منك أنه الموت، لكنك تستيقظ بعد ساعات غير مصدق أن عمرًا جديدا قد كٌتب لك.

متضحكوش على الناس كي يقولولكم راهو عنا قلق مرضي، ونوبات ذعر، ومتقولولهمش يزي مالتشوكيع والفيناس وراهي حاجة عادية، المرض هذا خايب ومتعب وعذاب لا يتوقف، وعدم قدرة على النوم، وانقطاع للنفس وقت تحاول ترقد وتشهق كل ليلة في محاولات بائسة بش يهزك النوم، ومهدئات وضغط نفسي وارهاق لا ينتهي اثناء يومك لان نومك اصلا متقطع وغير مسترسل ومعندكش طاقة بش تبدى نهارك او تخدم خدمتك، ولا تنجم تجاوب على مساجات ولا تخدم خدمة منظمة ولا تركز تركيز متواصل ولا تتفاعل بسرعة ولا تكون نشيط ولا فرحان. وتقنيا وطبيا فلا علاج متوفر له حتى اليوم، كل المحاولات لا تتجاوز اطار التخفيف من الأعراض لا أكثر، ومحاولات مساعدتك على النوم، النوم المريح لي يتحول لحلم بعيد المنال وقت يتعدى شطر الليل في محاولات يائسة للتنفس لا أكثر، مع يأس شبه تام بامكانية مرور هذا المرض واختفائه يومًا ما.

نوبات الهلع والقلق المرضي، كلاهما غيرا نظرتي للعالم، ونظرتي للموت، رفعا غطاء الدهشة عن الموت تماما، وأصبح الاقتراب منه لعبة أخوضها كل مرة، وأنجو منها، ولا أعلم متى سأقع في الفخ، وأمر الى الجانب الآخر المظلم.

القلق المرضي يتسبب اساسا بتراكم الضغوطات الاجتماعية والمالية والعاطفية وبرشة حاجات أخرى، هو جبل من التراكمات النفسية كل يوم يتعدى كل ما ترزن وتزيد فوق ظهرك وكيانك.

اذا كان عندك قلق مرضي وتجيك نوبات هلع، فأنا أتضامن معك، وأتفهمّك، وأحس بك، وأحبّك.

لوحة: نوبة هلع لمونتينا هوساي.